Pwy sy’n gymwys

Gallech gael y cyllid hwn os gallwch nodi eich bod yn un o’r canlynol:

Rydych yn un o wladolion y DU neu’n ddinesydd Gwyddelig neu mae gennych statws preswylydd sefydlog neu gyn-sefydlog dan y Cynllun Preswylio’n Sefydlog i Ddinasyddion yr UE neu rydych wedi cael caniatâd amhenodol i aros fel nad oes unrhyw gyfyngiadau ar ba mor hir y gallwch aros yn y DU.

Rhaid:

• eich bod yn byw fel rheol yng Nghymru
• eich bod wedi bod yn byw yn y DU, ar Ynysoedd y Sianel neu ar Ynys Manaw am y tair blynedd cyn diwrnod cyntaf eich blwyddyn academaidd gyntaf

Os ydych wedi bod yn byw yn y DU, ei Hynysoedd neu Iwerddon, neu’r DU, ei Hynysoedd neu’r Tiriogaethau Tramor Prydeinig penodedig am y tair blynedd cyn dechrau eich blwyddyn academaidd gyntaf, gallech gael cyllid i astudio cwrs yng Nghymru.

Os ydych yn un o wladolion yr UE neu’n aelod o deulu un o wladolion yr UE

Gallech gael y cyllid hwn:

• os oes gennych statws preswylydd sefydlog neu gyn-sefydlog dan y Cynllun Preswylio’n Sefydlog i Ddinasyddion yr UE
• os ydych yn astudio yng Nghymru

• wedi bod yn byw yn y DU, yr AEE, y Swistir neu’r Tiriogaethau Tramor am y tair blynedd cyn diwrnod cyntaf blwyddyn academaidd gyntaf eich cwrs

Nid oes angen i ddinasyddion Gwyddelig wneud cais i’r Cynllun Preswylio’n Sefydlog i Ddinasyddion yr UE ond byddai angen iddynt fod yn byw yn y DU erbyn 31 Rhagfyr 2020 i gael cyllid dan y categorïau hyn.

Mae’n bosibl y byddwch hefyd yn gymwys os ydych yn un o wladolion y DU (neu’n aelod o deulu un o wladolion y DU) neu’n ddinesydd Gwyddelig:

• sydd wedi dychwelyd i’r DU ar 1 Ionawr 2018 neu wedi hynny ac erbyn 31 Rhagfyr 2020 ar ôl bod yn byw yn yr UE, y Swistir, Norwy, Gwlad yr Iâ neu Liechtenstein, neu
• a oedd yn byw yn yr UE, y Swistir, Norwy, Gwlad yr Iâ neu Liechtenstein ar 31 Rhagfyr 2020 ac sydd wedi bod yn byw yn y DU, yr UE, Gibraltar, y Swistir, Norwy, Gwlad yr Iâ neu Liechtenstein yn ystod y 3 blynedd diwethaf

Mae cyllid ar gael hefyd i aelodau o deulu gwladolion y DU os oedd yr aelod o’r teulu yn byw yn y DU a’r Ynysoedd am y tair blynedd cyn diwrnod cyntaf blwyddyn academaidd gyntaf y cwrs.

Gallwch wneud cais am gyllid os ydych wedi bod yn byw yn y DU, Tiriogaethau Tramor, yr AEE neu’r Swistir am y 3 blynedd diwethaf a bod gennych un o’r canlynol:

• os oes gennych statws preswylydd cyn-sefydlog dan y Cynllun Preswylio’n Sefydlog i Ddinasyddion yr UE a’ch bod yn aelod o deulu person o Ogledd Iwerddon
• os oes gennych statws preswylydd yn Gibraltar fel un o wladolion yr UE neu aelod o deulu un o wladolion yr UE, neu fel un o wladolion y DU neu aelod o deulu un o wladolion y DU
• os ydych wedi bod yn byw yn Gibraltar fel un o wladolion y DU neu aelod o deulu un o wladolion y DU
• os ydych yn weithiwr mudol o’r Ardal Economaidd Ewropeaidd neu’r Swistir (gan gynnwys aelodau’r teulu) sydd â statws preswylydd sefydlog neu gyn-sefydlog dan y Cynllun Preswylio’n Sefydlog i Ddinasyddion yr UE
• os ydych yn blentyn i un o wladolion y Swistir a bod gennych chi a’ch rhiant statws preswylydd sefydlog neu gyn-sefydlog dan y Cynllun Preswylio’n Sefydlog i Ddinasyddion yr UE

Gallwch hefyd wneud cais am gyllid:

• os ydych yn blentyn i weithiwr o Dwrci a bod eich rhiant/llys-riant sy’n weithiwr o Dwrci wedi cael caniatâd i aros am gyfnod estynedig yn y DU, ac mae angen eich bod chi a’ch rhiant/llys-riant sy’n weithiwr o Dwrci yn byw yn y DU erbyn 31 Rhagfyr 2020
• os ydych wedi cael gwarchodaeth ddyngarol (neu os oes gennych deulu sydd wedi cael gwarchodaeth ddyngarol)
• os ydych wedi cael caniatâd i aros am resymau’n ymwneud â bywyd teuluol neu breifat, neu os ydych yn aelod o deulu rhywun sydd wedi cael caniatâd i aros am resymau’n ymwneud â bywyd teuluol neu breifat, a’ch bod wedi bod yn byw yn y DU a’r Ynysoedd am o leiaf 3 blynedd cyn diwrnod cyntaf blwyddyn academaidd gyntaf eich cwrs
• os ydych wedi cael caniatâd yn ôl disgresiwn, oherwydd cais aflwyddiannus am loches neu os na wnaed cais am loches, neu os ydych yn aelod o deulu rhywun sydd wedi cael caniatâd o’r fath
• os ydych yn berson diwladwriaeth neu’n aelod o deulu person diwladwriaeth
• os ydych wedi cael caniatâd i aros dan adran 67 Deddf Mewnfudo 2016, neu os ydych yn blentyn i rywun sydd wedi cael caniatâd i aros dan adran 67 Deddf Mewnfudo 2016
• os ydych yn ffoadur (neu os oes unrhyw aelod o’ch teulu yn ffoadur)
• os ydych wedi cael ‘caniatâd i aros’ yn y DU fel dioddefwr camdriniaeth neu drais domestig, neu os ydych yn blentyn dibynnol i rywun sydd wedi cael caniatâd o’r fath
• os ydych wedi cael ‘caniatâd Calais’ i aros yn y DU
• os ydych yn blentyn i rywun sydd wedi cael ‘caniatâd Calais’ i aros yn y DU, a’ch bod hefyd wedi cael caniatâd i aros yn y DU am yr un cyfnod â’ch rhiant (a elwir yn ‘ganiatâd oherwydd llinach’)
• os ydych wedi cael ‘caniatâd i aros’ yn y DU fel partner gweddw, neu os ydych yn blentyn dibynnol i rywun sydd wedi cael caniatâd o’r fath
• neu os yw’r aelod o’ch teulu wedi cael caniatâd i aros dan y Polisi Adleoli a Chymorth i Affganiaid neu'r Cynllun Adsefydlu Dinasyddion Affganistan
• wedi cael caniatâd i ddod i mewn i’r DU neu i aros yn y DU dan y Cynllun Teuluoedd o Wcráin, y Cynllun Noddi Cartrefi i Wcráin, neu’r Cynllun Estyn Cyfnod Gwladolion o Wcráin.

Rhaid bod eich cwrs:

• yn gwrs Gradd Doethur annibynnol llawn (h.y. nad yw’n gwrs atodol)
• wedi dechrau ar 1 Awst 2018 neu wedi hynny
• yn para rhwng 3 ac 8 mlynedd

Gall fod yn:

• gwrs llawn-amser neu ran-amser
• yn gwrs a addysgir neu sy’n seiliedig ar ymchwil

Mae enghreifftiau o gyrsiau Gradd Doethur Ôl-raddedig yn cynnwys:

• cwrs PhD (Doethur mewn Athroniaeth)
• cwrs EdD (Doethur mewn Addysg)
• cwrs EngD (Doethur mewn Peirianneg)

Cyllid hyfforddiant i athrawon

Os oes gennych radd i israddedigion yn barod ac os ydych yn bwriadu dilyn cwrs Addysg Gychwynnol i Athrawon sy’n gwrs ôl-raddedig, dylech wneud cais am yr un cyllid â myfyriwr israddedig. Mae hynny’n golygu y gallech fod yn gymwys i wneud cais am gymorth o ran ffïoedd dysgu ac am help gyda’ch costau byw.

Mae’n bosibl y byddwch hefyd yn gymwys i gael rhai cymhellion Addysg Gychwynnol i Athrawon. Dylech gysylltu â’ch prifysgol ynglŷn â’r rhain. 

Dysgu o bell

Os byddwch yn astudio drwy ddysgu o bell, bydd angen i chi fod yn byw:

• yng Nghymru ar ddiwrnod cyntaf blwyddyn academaidd gyntaf eich cwrs
• ac yn y DU drwy gydol eich cwrs

Nid yw hynny fel rheol yn berthnasol:

• os ydych yn gwasanaethu yn y lluoedd arfog
• os ydych dan 25 oed ac yn blentyn neu’n llysblentyn rhywun sy’n gwasanaethu yn y lluoedd arfog
• os ydych yn briod neu’n bartner sifil rhywun sy’n gwasanaethu yn y lluoedd arfog
• os ydych yn rhiant dibynnol, sy’n byw gyda rhywun sy’n gwasanaethu yn y lluoedd arfog

Rhaid i wladolion yr UE fyw yng Nghymru drwy gydol eu cwrs.

Cyrsiau integredig

Gallwch gael Benthyciad Gradd Doethur Ôl-raddedig os yw eich rhaglen ddoethurol yn cynnwys Gradd Meistr integredig, hyd yn oed os oes gennych Radd Meistr yn barod.

Rhaid bod eich prifysgol neu’ch coleg:

• yn y DU
• ac yn sefydliad sydd wedi’i gymeradwyo ar gyfer cyllid gan Lywodraeth Cymru

Os oes mwy nag un brifysgol yn cyflwyno eich cwrs a bod un ohonynt dramor, byddwch yn dal yn gymwys i gael Benthyciad Gradd Doethur Ôl-raddedig ar yr amod:

• mai’r brifysgol yn y DU yw’r sefydliad arweiniol
• caiff o leiaf 50% o’r addysgu a’r goruchwylio ei ddarparu yn y DU

Gofynnwch i’ch prifysgol neu’ch coleg os nad ydych yn siŵr a yw’n gymwys.

Rhaid eich bod dan 60 oed ar ddiwrnod cyntaf blwyddyn academaidd gyntaf eich cwrs.

Mae’r flwyddyn academaidd yn dechrau ar:

• 1 Medi, os yw eich cwrs yn dechrau rhwng 1 Awst a 31 Rhagfyr
• 1 Ionawr, os yw eich cwrs yn dechrau rhwng 1 Ionawr a 31 Mawrth
• 1 Ebrill, os yw eich cwrs yn dechrau rhwng 1 Ebrill a 30 Mehefin
• 1 Gorffennaf, os yw eich cwrs yn dechrau rhwng 1 Gorffennaf a 31 Gorffennaf

Ni allwch gael Benthyciad Gradd Doethur Ôl-raddedig:

• os ydych wedi cael Benthyciad Gradd Doethur Ôl-raddedig yn barod
• os oes gennych Radd Doethur yn barod, neu gymhwyster sy’n gyfwerth â Gradd Doethur neu ar lefel uwch na hynny

Mae'n bosibl y byddwch yn gallu cael cyllid os na wnaethoch lwyddo i gwblhau eich cwrs blaenorol oherwydd rheswm personol a chymhellol.

Mae salwch neu brofedigaeth yn enghreifftiau o resymau personol cymhellol, ond gellir adolygu amgylchiadau fesul achos. Bydd angen i chi ddarparu tystiolaeth o hynny.

Ni allwch gael Benthyciad Doethuriaeth Ôl-raddedig os ydych chi’n cael:

• cyllid o’r cynllun KESS 2, neu
• bwrsariaeth gwaith cymdeithasol.

Mae hyn yn cynnwys unrhyw gynlluniau cyfatebol yn Lloegr, yr Alban a Gogledd Iwerddon.

Hefyd ni allwch gael Benthyciad Doethuriaeth Ôl-raddedig os ydych chi’n:

• derbyn neu gael eich talu Bwrsariaeth y GIG
• yn astudio ym Mhrifysgol Caerdydd ac yn cael Bwrsariaeth Seicoleg Addysg
• yn derbyn lwfans, bwrsariaeth neu wobr a wnaed gan Ymchwil ac Arloesedd y Deyrnas Unedig (UKRI) tuag at eich cwrs doethuriaeth ôl-raddedig.