Incwm y cartref

Os ydych yn byw gyda’ch rhiant/rhieni neu’ch gwarcheidwad/gwarcheidwaid, ac os ydych yn dibynnu arnynt yn ariannol, byddwch yn cael eich ystyried yn fyfyriwr dibynnol. Byddwn yn defnyddio manylion incwm eich rhiant/rhieni neu’ch gwarcheidwad/gwarcheidwaid i gyfrifo incwm eich cartref. Os ydych yn gweithio’n rhan-amser neu’n byw gyda’ch brawd/brodyr neu’ch chwaer/chwiorydd, ni fydd unrhyw incwm yr ydych chi neu y maen nhw’n ei ennill yn cael ei ddefnyddio.

Mae rhagor o wybodaeth am incwm y cartref i’w chael yn yr adran rhieni, gwarcheidwaid a phartneriaid.

Byddwch yn cael eich ystyried yn fyfyriwr annibynnol os nad ydych yn byw gyda’ch rhiant/rhieni neu’ch gwarcheidwad/gwarcheidwaid. Byddwn yn defnyddio eich enillion chi i gyfrifo incwm eich cartref. Os ydych yn byw gyda phartner, bydd enillion eich partner hefyd yn cael eu hystyried yn rhan o incwm eich cartref.

At hynny, byddwch yn cael eich ystyried yn annibynnol:

• os ydych yn berson sy’n gadael gofal
• os ydych yn byw yng ngofal awdurdod lleol neu gyda rhieni maeth
• os ydych yn cael Cymhorthdal Incwm, Lwfans Cyflogaeth a Chymorth yn seiliedig ar incwm, neu Gredyd Cynhwysol
• os ydych yn gyfrifol am blentyn
• os ydych yn berson ifanc mewn dalfa
• os ydych wedi ymddieithrio oddi wrth eich rhieni

Os ydych yn un o’r uchod, ni fydd angen i chi roi unrhyw wybodaeth ariannol i ni pan fyddwch yn cwblhau eich cais ond bydd angen i chi anfon tystiolaeth o’ch statws.

Ewch i'n canllaw myfyrwyr annibynnol (Lawrlwythiad PDF 103KB, yn agor mewn tab newydd) i gael rhagor o wybodaeth.

Ceir dau drothwy gwahanol ar gyfer incwm y cartref. Eich amgylchiadau teuluol fydd yn penderfynu pa drothwy sy’n berthnasol i chi.