Myfyrwyr sy’n gyfrifol am ad-dalu benthyciadau myfyrwyr – nid rhieni na phartneriaid

Os yw’ch plentyn neu’ch partner yn ymgeisio am gyllid prawf modd, bydd gofyn i chi gyflwyno gwybodaeth yn ymwneud â’ch incwm er mwyn cefnogi eu cais. Serch hynny, nid yw hyn yn golygu y byddwch yn gyfrifol am unrhyw ddyled ganlyniadol. Mae hyn yn parhau yn wir os:

• yw'r myfyriwr yn tynnu'n ôl o addysg uwch
• nad yw eu henillion yn cyrraedd y lefel sy’n ofynnol er mwyn cychwyn ad-dalu'r ddyled, neu
• os ydynt yn marw a hwythau yn parhau mewn dyled i'r Cwmni Benthyciadau i Fyfyrwyr.

Incwm cartref – sut mae’n cael ei ddefnyddio i gyfrif hawliad

'Incwm cartref’ yw incwm cyfun y myfyriwr a’r rhieni neu’r partner sy’n byw gyda hwy. Gall hyn hefyd gynnwys incwm llysfam, llystad, partner y fam neu bartner y tad.

Pan fydd cais myfyriwr am gefnogaeth ariannol yn cael ei asesu, gall yr Awdurdod Lleol ddefnyddio'r incwm cartref i benderfynu ar lefel y cyllid a gynigir i'r myfyriwr.

Os byddwch yn rhoi manylion eich incwm, gall y myfyriwr dderbyn mwy o help gyda’u ffioedd hyfforddi, grant i helpu gyda’u costau byw a lefel uwch o fenthyciad i fyfyrwyr. Os na fyddwch yn rhoi manylion eich incwm i’ch Awdurdod Lleol, efallai na fydd y myfyriwr yn derbyn yr holl gefnogaeth ariannol y mae ganddo’r hawl i'w derbyn.

Tystiolaeth o'ch incwm cartref

Pan fyddwch yn darparu manylion o’ch incwm, bydd angen i chi anfon dogfennau gwreiddiol fel prawf o’ch incwm. Os byddwch yn cefnogi cais myfyriwr ar-lein, esbonnir hyn wrthych chi ar y diwedd. Os byddwch yn ymgeisio ar bapur, esbonnir hyn yn y nodiadau arweiniad.

Os bydd eich incwm cartref yn newid wrth i'r myfyriwr astudio

Bydd yr ALl yn edrych ar eich incwm am flwyddyn ariannol 08/09 i benderfynu faint y gall myfyriwr ei hawlio. Fodd bynnag, os bydd eich incwm cartref yn gostwng 15% neu fwy, dylai’r myfyriwr roi gwybod i’r ALl ac yn hytrach bydd yn adolygu eich incwm tebygol ar gyfer y flwyddyn gyfredol. Mae’n ailasesu hawl y myfyriwr yn seiliedig ar eich incwm newydd.

Fe ddylech chi lanw ac anfon Ffurflen Asesu Incwm y Flwyddyn Gyfredol os bydd eich incwm yn newid wrth i'r myfyriwr astudio ei gwrs. Ymwelwch â Thudalen ffurflenni a chanllawiau i ddadlwytho Ffurflen Asesu Incwm y Flwyddyn Gyfredol.

Os bydd yr Awdurdod Lleol yn penderfynu y dylech wneud cyfraniad tuag at ffioedd hyfforddi a chostau byw’r myfyriwr, byddant yn dweud wrthych chi faint y dylech ei dalu er mwyn eu cefnogi.

Beth sy’n cyfrif fel incwm cartref os mai chi yw rhiant y myfyriwr?

Os ydych chi’n rhiant ar fyfyriwr sydd fel arfer yn byw gyda chi, mae’r rheolau a ganlyn yn berthnasol:

1. Os ydych chi wedi gwahanu neu gael ysgariad, bydd eich incwm chi yn cyfrif tuag at yr incwm cartref ond ni fydd incwm rhiant arall y myfyriwr yn cyfrif.
2. Os ydych chi wedi ailbriodi neu’n byw gyda phartner (o’r rhyw arall neu’r un rhyw), bydd eu hincwm yn cyfrif tuag at yr incwm cartref.

Os mai chi yw rhiant y myfyriwr a bod gennych blant dibynnol eraill, bydd eich Awdurdod Lleol yn diystyru £1,130 o’ch incwm cartref ar gyfer unrhyw blant arall sy’n gyfan gwbl, neu’n rhannol, ddibynnol arnoch chi’n ariannol cyn iddynt gyfrifo eich cyfraniad.

Er enghraifft: os ydych chi’n ennill £20,000 y flwyddyn a bod gennych ddau o blant, ac y mae un ohonynt yn fyfyriwr. Bydd yr Awdurdod Lleol yn diystyru £1,130 o’ch incwm ac yn ystyried bod gennych incwm o £18,870 ar gyfer eu hasesiad.

Sicrhau caniatâd i drafod cais myfyriwr pan fyddwch yn ffonio Cyllid Myfyrwyr Cymru

Os byddwch yn cysylltu â ni ar y ffôn neu trwy e-bost, nid oes gennych ganiatâd awtomatig i drafod cais y myfyriwr am gyllid. Mae’r Ddeddf Diogelu Data yn gofyn i ni gadw’ch holl wybodaeth, a gwybodaeth y myfyriwr, yn breifat.

Eich rôl fel rhiant neu bartner myfyriwr yw cynnig gwybodaeth i gefnogi cais am fenthyciad, grant, neu gymorth gyda ffioedd hyfforddi. Nid yw hyn yn rhoi’r hawl i chi am wybodaeth ynghylch cais y myfyriwr am gymorth.

Serch hynny, os dymunwch wneud ymholiadau ar ran myfyriwr, gallant roi caniatâd i Gyllid Myfyrwyr drafod eu cyfrif gyda chi. Sicrhau caniatâd i rannu gwybodaeth y myfyriwr.

Mewngofnodi i Gyllid Myfyrwyr Cymru i gefnogi cais

Pam y mae angen i mi gofrestru a mewngofnodi?

Rydym yn cynnig cyfrif ar-lein i rieni a phartneriaid myfyrwyr er mwyn iddynt nodi eu gwybodaeth incwm cartref er mwyn cefnogi cais myfyriwr. Mae hon yn ffordd ddiogel o rannu eich gwybodaeth gyfrinachol dros y rhyngrwyd.

Eich Cyfeirnod Cwsmer – ar gyfer rhieni a phartneriaid myfyrwyr

Mae angen Cyfeirnod Cwsmer ar unrhyw un sy'n mewngofnodi i Gyllid Myfyrwyr Cymru - myfyrwyr a'u rhieni a phartner os ydynt yn cefnogi cais ar-lein.

Pan fyddwch yn mewngofnodi i’ch cyfrif trwy wefan Cyllid Myfyrwyr Cymru fe’ch anogir i roi eich Cyfeirnod Cwsmer, eich cyfrinair rhyngrwyd a’ch ateb cyfrinachol. Argreffir eich Cyfeirnod Cwsmer ar bob gohebiaeth y byddwch yn ei derbyn gan Gyllid Myfyrwyr Cymru.

Eich cyfrinair ac ateb cyfrinachol

Bydd eich cyfrinair ac ateb cyfrinachol yn fodd o’ch adnabod chi pan fyddwch yn mewngofnodi i Wefan Cyllid Myfyrwyr Cymru. Pan fyddwch yn cofrestru ar-lein cewch ddewis eich cwestiwn ac ateb cyfrinachol. Os ydych chi wedi cefnogi cais yn faenorol, rhaid i chi ddefnyddio’r Cyfeirnod Cwsmer, ateb cyfrinachol a chyfrinair a roddwyd i chi’n flaenorol er mwyn mewngofnodi i'r system.

Os wnaeth y myfyriwr ymgeisio am gyllid myfyrwyr ar bapur, anfonir cyfrinair ac ateb cyfrinachol cychwynnol i chi yn y post. Bydd hyn yn gyfuniad o lythrennau a rhifau ar hap. Yna cewch gyfle i ddewis eich cyfrinair ac ateb cyfrinachol eich hunan pan fyddwch yn mewngofnodi.

Beth ddylwn ei wneud os byddaf yn anghofio fy nghyfrinair neu ateb cyfrinachol?

Os byddwch yn anghofio eich ateb cyfrinachol, gallwch ei ailosod ar-lein. Dewiswch y cyswllt ‘Wedi anghofio fy manylion’ ar y dudalen mewngofnodi.

Bydd eich cyfrif yn cael ei gloi ar ôl tri ymgais aflwyddiannus i fewngofnodi. Serch hynny, gallwch ddal ailosod eich cyfrinair ac ateb cyfrinachol ar-lein, a fydd yn datgloi eich cyfrif.

Beth yw Alias ID?

Pan fydd myfyriwr yn ymgeisio am gyllid, rhoddir rhif 11 digid iddynt o’r enw Alias ID. Defnyddir y rhif hwn i gysylltu eich cyfrif ar-lein â’r myfyriwr er mwyn i chi roi eich manylion ariannol ar-lein. Ar ôl i chi fewngofnodi i'r gwasanaeth ar-lein, bydd arnoch angen Alias ID a dyddiad geni’r myfyriwr er mwyn cefnogi eu cais.

Bydd gennych Alias ID gwahanol ar gyfer pob myfyriwr yr ydych chi'n ei gefnogi. Bydd y myfyriwr yn derbyn eu Alias ID pan fyddant yn ymgeisio ar-lein. Fe’i hanfonir atoch chi hefyd trwy lythyr neu e-bost.