|
Pa gymorth sydd o ran rheoli fy materion ariannol wrth astudio?
Mae’r Awdurdod Gwasanaethau Ariannol (FSA) yn gweithio gyda Sefydliadau Addysg Uwch ar roi cyngor ac arweiniad i fyfyrwyr ynghylch sut i’w hatal rhag mynd i drafferthion ariannol trwy becyn offer Doctoriaid Ariannol (Money Doctors). Y nod yw darganfod sut gall Prifysgolion helpu eu myfyrwyr orau i ymdopi â materion ariannol.
Mae’r prosiect Doctoriaid Ariannol yn helpu myfyrwyr mewn addysg uwch i ddod yn fedrus yn ariannol trwy addysg ac ymyriad. Mae’n annog myfyrwyr i wynebu dyled a chymryd rheolaeth ar eu materion ariannol eu hunain cyn iddynt fynd i drafferthion. Mae’r FSA yn cyflawni’r prosiect trwy ymgynghorwyr ariannol myfyrwyr mewn Sefydliadau Addysg Uwch ledled y DU, ac maent yn hyfforddi ac yn gweithio gyda’r cyfryngwyr hyn i’w cefnogi nhw i fod wrthi’n gwella gallu ariannol eu myfyrwyr. Bydd gan eich Coleg neu Brifysgol gopi o’r pecyn offer Doctoriaid Ariannol.
www.fsa.gov.uk/financial_capability
Gwybodaeth am y Llythyr Hysbysiad Ariannol
Os ydych wedi cyflwyno cais cyflawn am gyllid i fyfyrwyr yn ddiweddar, fe fyddwch yn derbyn llythyr Hysbysiad Ariannol a Ffurflen Datganiad pan fydd eich cais wedi cael ei asesu. Fe fydd y llythyr hwn yn rhoi manylion y cymorth y mae gennych hawl iddo.
Mae’r wybodaeth ganlynol yn cyfeirio at rai materion a godwyd ynghylch y llythyr hwn.
Ffïoedd Dysgu
Swm y Benthyciad fydd yn cael ei Dalu yw swm y Benthyciad Ffïoedd Dysgu y bydd yr SLC yn ei dalu i’ch prifysgol neu goleg ar eich rhan.
Os yw swm y Benthyciad Ffïoedd Dysgu y mae gennych hawl i’w dderbyn neu’r swm rydych wedi gofyn amdano yn llai na ffïoedd eich cwrs, fe fydd angen i chi dalu’r gwahaniaeth i’ch prifysgol neu goleg.
Benthyciad Cynhaliaeth
Swm y Benthyciad fydd yn cael ei Dalu yw cyfanswm y Benthyciad Cynhaliaeth a dderbyniwch. Os ydych hefyd yn derbyn grant nad oes angen ei ad-dalu, fel Grant Dysgu’r Cynulliad, bydd faint o Fenthyciad Cynhaliaeth a gewch chi yn lleihau yn ôl swm y grant hyd at ostyngiad o £2,844 ar y mwyaf. Mae eich hawl i grant yn cael ei ddangos yn y tabl Grantiau Atodol ar eich llythyr.
| 
